صبغت غرفتي بنفسي

ليش قررت اصبغ الغرفة بنفسي؟

الشي الغريب بالموضوع ان فكرة صبغ جدران الغرفة بنفسي جاء فجأه، استغلال العمالة لنا حز بخاطري

ومبالغتهم بالاسعار حز بخاطري اكثر

يبالغون بالاسعار وهم متاكدين اننا بنوافق ومابنستغني عنهم

عامل طلب مننا ١٥٠٠ ريال عشان بس يصبغ غرفة وحده، والمبلغ جدا كبير لان الغرفة ماتحتاج اساس وماتحتاج معجون

المبلغ اللي طلبه ما يتضمن الادوات، يعني الادوات لها سعر لحالها

الموضوع فيه استغلال بشكل مو طبيعي، حقه ٢٠٠ ريال بالكثير مو ١٥٠٠

بعد ما فكرت في سهولة الموضوع واني اقدر اصبغ زي ما هم يقدرون، قررت اني اروح واشتري البوية والادوات وابدا اصبغها بنفسي.

رحت دهانات الجزيرة، الموظف سعودي وكان جدا متعاون معنا بعد ماعرف اننا احنا اللي بنصبغ وبنستغني عن العمال، اسلوبه فيه تشجيع لنا وكانه فخور ومبسوط ان فيه امل في الاستغناء عن "النصابين" .

ايش الادوات اللي احتجتها؟

فيه بعض الاشياء تكون صعبه للمبتدئين، زي الاساسات وطبقة المعجون اللي تكون في مراحل البناء

فما بتكلم عنها لاني مااعرف بخصوصها 

اللي بتكلم عنه هو طريقة الصبغ فقط. والادوات ومن وين اخذتها

كل الادوات اللي اخذتها من دهانات الجزيرة ، وعني احسها من افضل الدهانات، الوانها كثيرة جدا، البوية مافيها ريحة والجودة تجنن

لو كان لون الجدار غير الابيض او الالوان الفاتحة جداً بتحتاجون اساس ابيض مطفي

ايضا لون كانت بوية الجدار لمعة فما راح يثبت فيه الطلاء الا باساس مطفي "بوية مطفيه"

يعني اللي يحتاجون اساس ابيض مطفي يكتبونه في قائمة الادوات اللي بتشترونها

ايضا بتحتاجون رول كبير لصبغ الجدار مو لصبغ السقف، لانها تختلف واذا بتصبغون اساس اشتروا رولين واحد للاساس وواحد للون

 وفرشتين حجمها مثل ٣ اصابع وحدة للاساس ووحدة للون

 لاصق ورقي "شطرطون ورقي"

والبوية باللون اللي تبغونه

ايضا "تنر" التنر مادة احد استخدامتها تنظيف وازالة الطلاء

كمية البوية اللي تحتاجونها اسالوا الموظف عنها، اعطوه تفاصيل الغرفه الطول والعرض والارتفاع وبيحسبها لكم واعطوه خبر ان انتوا اللي بتصبغون عشان يضبط لكم كل شي

الخطوات: 

اول شي شيلوا كل شي من الجدار ، لوحات او ساعه و الستاير 

اللاصق الورقي غطوا فيه اطراف الباب واطراف الافياش والشبابيك واطراف السقف وكل شي ماتبغون البوية توصل له

الارضية حطوا عليها سُفر او جرايد اذا باقي فيه :) اطراف الارضيه غطوها بلاصق ورقي

بعد كذا بالفرشة اصبغوا الاساس الابيض كل شي مايوصل له الرول بسهوله "حوالين الاماكن اللي غطيناها باللاصق الورقي" 

وبعد كذا بالرول اصبغوا الجدار كامل

بعد ما تخلصون الاساس اتركوه ينشف ساعه ونص الى ساعتين تقريبا

 بعد كذا بنفس الخطوات نصبغ اللون، ونتركه ينشف ساعه ونص او ساعتين ، ونسوي طبقة ثانيه باللون بنفس الخطوات

ونتركه ينشف 

بعد ماتنشف البويه تماما نشيل اللاصق الورقي وبكذا انتهينا 

لو  تلطخت الارضية او الباب او النوافذ او اي شي امسحوها بتنر وبعدها امسحوا بموية 

شوفوا هذا الفيديو بيفيدكم 

ادهني حوائط منزلك بنفسك https://www.youtube.com/watch?v=-skWhTngago

.....

وفرت ١٧٠٠ ريال كنت بعطيها العامل، طبعا الغرفه مصبوغة اساس ابيض من قبل

بس احتجت ٢ جالون بوية لون سعر العلبة ٩٣، رول ب١٥  وفرشة ١٠ كلها كلفتني ٢١٦ ريال بس

متخيلين المبلغ اللي وفرته؟ 

لازم نتعلم كل شي ، مو شرط نكون محترفين بس عالاقل نقدر نسوي الاشياء البسيطة

الى متى استغلال العماله لنا الى متى يشوفوننا مانقدر نسوي شي بدونهم

صاروا يرفعون الاسعار لانهم يدرون ان مصيرنا بنعطيهم المبلغ اللي يبغونة

لو يعرفون اننا فقدنا حاجتنا لهم بيحطون اسعار معقولة والكل يتقبلها

انا عني بدأت مع نفسي حملة مقاطعة الاستغلاليين وبتعلم كل الاشياء الاساسية اللي مايحتاج لها احتراف.