نصائح للسنة التحضيرية
السنة التحضيرية هي اول سنة في الجامعة، غالبا المواد اللي تُدَرّس في هذي السنة هي مواد تهيئة عامة مثل: الانجلش المكثف، بعض المواد العلمية مثل الفيزياء، الكيمياء للتخصصات الصحية، مواد دينية لتخصصات الدين ، رياضيات وحاسب وانجلش لتخصصات الحاسب والهندسة، وهكذا..
بعد السنة التحضيرية يبدا الطالب يدرس المواد الخاصة بتخصصة ، زي التشريح مثلا لتخصص الطب.
السنه التحضيرية فرصة كبيرة جدا عشان كل احد يتعرف على نفسه فيها، يعرف ايش يحب وايش يكره، طريقة المذاكرة المناسبة، طريقة اخذ الملاحظات
انا عني في السنة التحضيرية تحسنت لغتي الانجليزية بشكل كبير، عرفت اني انسانة ورقية اكثر من كوني الكترونية (احب محاضراتي تكون ورقية، واخذ ملاحظاتي في المحاضرة كتابيا في ورقة ملاحظات) غيري يفضلون الاجهزة اللوحية واللاب توب وياخذون الملاحظات بتسجيل صوتي، طبعا ما امانع لو اخذت ملاحظاتي بصورة او بتسجيل صوتي بس دايما اميل لاني اكتبها اما في اوراق المحاضرة او في ستيكر.
باختصار السنة التحضيرية سنة التجارب ومعرفة الذات، لو ماجربتي كل الطرق ماراح تعرفين افضل طريق لك.
نصائح:
١- لو كانت المحاضرة دش ومو مفهومة بس شرح الدكتورة حلو، خذي تسجيل صوتي للمحاضرة، وارجعي له وقت الحاجة.
اما لو كان شرح الدكتورة مو مفهوم ويشتت لا تاخذين تسجيل صوتي لان الوقت بيضيع وانتي تحاولين تجمعين المعلومات.
٢- دايما بنفس اليوم راجعوا كل اللي اخذتوه، رتبي ملاحظاتك، اسمعي التسجيل الصوتي وحددي النقاط المهمة، ابحثي عن الاشياء اللي مو عارفتها واكتبي تلخيص لها في ورقة ملاحظات وثبتيها في نفس المحاضرة، عشان يسهل لك تلاقينها.
٣- النوم الكافي اهم شي وقت الدوام، بالنسبة لي وقت الدوام انام بعد صلاة العشاء لحد صلاة الفجر، بعدها اقوم اسوي كل الاشياء اللي احب اسويها الصباح ، رياضة خفيفة ١٠ دقايق، اتروش، افطر، اكمل واجباتي، ولو باقي وقت اشوف مسلسلي 😂.
٤- علاقاتكم بالكل خلوها علاقة لطيفة فيها مبادرة ومساعدة للي يحتاج، بنفس الوقت لا تسمحون لاحد يستغلكم ويشتتكم عن دراستكم عشان هو يستفيد.
٥- لا تسمعون للي تقول اثبتي نفسك للدكاترة عشان يحبونك، لا تخلين هدفك رضا الدكتورة فقط، الدكاترة بيحبونكم لو كنتوا منضبطين بالوقت، مهتمين بالمحاضرة، درجاتكم مرتفعة، لا تنشبون للدكاترة لان اغلبهم يكرهون اللي ينشبون😅.
٦- نومة العصر امحوها من نظام حياتكم، حياتي الدراسية تحسنت بشكل كبير لما تركت نومة العصر، اليوم كامل يكون لي، واحسه يصير طويل ويكفي كل احتياجاتي واذاكر كل شي فيها، وطبعا انبسط فيها، اتقهوى او اطلع، اشوف حلقة من مسلسل، اجلس مع اهلي او اسوي ماسكات عناية 😂.
٧- جهزوا انفسكم ماديا ومعنويا قبل الجامعة بوقت كافي، ضروري لو كان عندك طابعة تشترينها وكل اشياءها ورق وحبر، ،كمان جهزي كل القرطاسية اللي تحتاجينها اقلام ،ستيكرز، دفاتر وكذا.
٩- اهتمي بمعدلك واحرصي انه يكون مرتفع دائما.
١٠- لو عندك سؤال اسالي دكتورك ، فيه دكتور درسني كان يقول : مافيه سؤال غبي، فيه سؤال خلفه اجابه لا تستحون من السؤال.
١١- نظموا كل شي اول باول عشان يسهل الوصول لها، في جهازك رتبي محاضرات كل ماده بمجلد ، وداخل المجلد قسمي كل شي يخص المادة، مجلدات داخل كل مجلد، زي كذا:
١٢- لو فيه بريكات طويله بين المحاضرات اقرأوا من المراجع قبل المحاضره، تدخلون المحاضره وعندكم خلفيه عن الدرس.
١٣- ساعدوا قد ماتقدرون، لو المساعدة ماراح تضيع وقتكم وتضركم ساعدوا، لو فيه بنات مو فاهمين جزئية انتي فاهمتها اشرحيها لهم، لو عندك معلومه تساعدهم قوليها لهم، الخير يرجع لصاحبه بخير دائما.
١٤- المدرسة زي الجامعة، لا تكثرين ميك اب ، لا تضيعين فترة الصباح في انك تقضينها عند المرايه، ثقتك بشكلك جزء لا يتجزأ من ثقتك بنفسك، خليك نظيفه شكلك مرتب ريحتك حلوة ويكفي.
١٥- لا تنسون اذكاركم كل صباح، لانها تمحي كل الطاقة السلبية، خليك مبتسمه للكل واشربي مويه فترة النهار كثير.
١٦- الجامعة ماراح تاخذ كل وقتك، خصصي وقت لنفسك، لعنايتك بشعرك وبشرتك وحتى بروحك، سوي الاشياء اللي تحبينها، مارسي هواياتك واستمتعي بحياتك.
ليست هناك تعليقات:
إرسال تعليق